منتدى لكل ابناء منطقة حلة عمر بالسودان و الخارج


    إستراحة رقم (2) مع عمي محمد الخضر (الصاقعة)

    شاطر

    المبارك ود إبراهيم

    المساهمات : 19
    تاريخ التسجيل : 20/08/2011

    إستراحة رقم (2) مع عمي محمد الخضر (الصاقعة)

    مُساهمة  المبارك ود إبراهيم في السبت أغسطس 20, 2011 5:35 am


    عمي محمد الخضر شخصية مميزة فريدة بقريتنا
    ترك لنا إرثا جميلا من الحكاوي نعتز به له الرحمة
    ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,
    إستراحة مع عمي محمد الخضر.
    عمي محمد الخضر الله يرحمه ويحسن إليه كان رجل شجاع لأبعد حد (زول ضكران تب) لا بخاف ولا بعرف الخوف إلا من الله و(....) ولديه طرائف ونوادر كثيرة تركها لنا إرثا في مجتمعنا البسيط قريتنا فأصبحنا نحلي بها أعراسنا وإجتماعياتنا , وأحاول أن ألقي الضوء علي بعض منها.لتكون إستراحة لكم من عناء العمل وطول الغربة.
    كما ذكرت لكم في المقدمة عن شجاعته فهو رجل حنيَن من الدرجة الأولي, لديه بنتين فقط وبحبهم حب مبالغ فيه ياريت تحبو بناتكم زيو لدرجة الواحدة فيهم لو طعنتها شوكة وجاتو تبكي (يقول ليها أريتني أكان ما ولدتك)

    المهم البنات كبرن والبت الكبيرة جاها عريس وعمي محمد ود الخضر لو بي مرادوا ما إعرسوهن نهائي, المهم يوم العرس عمي محمد (عنقريبوا مجدوع بعيد من البيت وجوطة البنات جاهو ولد بقرأ في
    المتوسطة إسمو عمر ود حمد النيل قال ليهو عمي محمد عرس فاطمة مبروك .) عمي محمد قال لي عمر ( هآآآآ الجنا المطموس ده عرس البت بباركوهو أمش إمش شترك مقطوع الطاريء)
    المهم عمر دا عندو سلك عريان حبة يعني فاطي سطر المهم بعد العرس بأيام عمي محمد بتونس
    في دكان عمنا العشيوة وهو دكان وسط بيتونا مثل دكان ود البصير واحد من الجماعة قال والله يا جماعة عمر ود حمد النيل دا أظنو مفوت طوالي رد عليهو عمي محمد قال ليهم عمر الفي المدرسة ؟؟قال أيوه عمي محمد قال ليهم ( والله الجنا دا من يوم بارك لي عرس البنت عرفتو مو شديد)
    أنا والله نظرتي أصلوا ما بتقع واطة الله إقطعوا وإقطع يومو ولآدة جن في جن.
    ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,

      الوقت/التاريخ الآن هو الإثنين ديسمبر 11, 2017 5:51 pm